Meir kontroll på veg på HiST
Sjukepleiarutdanninga er ikkje lovpålagt til å vurdere om studentane er skikka.
– Departementet ville ikkje innføre eit lovpålegg hos oss då lærarstudiet fekk dette for nokre år sidan, forklarer konsulent Bente Storrø i Høgskoleadministrasjonen.
Sjukepleiarstudentar har fem periodar med praksis i løpet av studiet. Kvar praksisperiode kan takast opp att ein gong. Etter to forsøk rykker studenten ned eit kull.
– Studentane kan bli råda å slutte på studiet, men ingen kan pressast ut, fortel Storrø.
Ho fortel at ei vurdering av kor skikka studentane er, no er på veg. Dette er ho glad for.
– Som sjukepleiar krevst ei viss modning og mellommenneskeleg evne. Ein skal tross alt overta styringa av livet til menneske som ikkje greier seg sjølv.
Konsulenten har i nokre tilfelle spekulert på korleis det skal gå med somme studentar ute i arbeidslivet. Ho meiner det kan skorte på ansvarsmedvitet, til dømes hos studentar som aldri greier å forhalde seg til fristar.
– Korleis skal dei klare seg ute i jobb når dei må ta ansvar til dømes i forhold til medisinar? Det handlar jo om livet til folk, poengterer ho.
