Nytt liv til NTNU-samling
10. mai vedtok NTNU-styret at universitetet skal behalde dagens tocampusmodell. Likevel vil rektor Torbjørn Digernes arbeide vidare med å samle NTNU.
SAMLOKALISERING
Men vedtaket heldt likevel døra på gløtt for samlokalisering:
• NTNU-styret ba staten om å avklare om den ønskjer ei utgreiing om begge campusløysingane (både encampus og tocampus) og om det er aktuelt med statlege midlar til ei samlokalisering
• Dersom staten gjer vedtak om å støtte ei samlokalisering gjennom midlar som kan realisere «behovet for læringsarealer og infrastruktur», vil NTNU vurdere encampusløysinga på nytt.
Og om du syntest dette var komplisert...
Ei vidareutvikling av dagens tocampusmodell inneber at NTNU sel tomteareal på Dragvoll for å finansiere nybygg på dei to campusane. Men eit slikt prosjekt må godkjennast av Stortinget.
For at Stortinget skal få eit godt nok grunnlag til å ta eit vedtak, må NTNU lage ei alternativanalyse. Denne skal innehalde minst to alternativ. Kunnskapsdepartementet har det er naturleg å «inkludere alternativer som har vært oppe til diskusjon tidligere i prosessen».
For å tilfredsstille desse krava foreslår rektor Torbjørn Digernes at _både_tocampusalternativet og encampusalternativet blir utgreidd vidare.
Det er tre grunnar til at Digernes meiner at universitetet må arbeide vidare også med samlokaliseringsplanane.
• Ein må ha to klart ulike hovudalternativ for å tilfredsstille Kunnskapsdepartementet sine krav til kvalitetssikringsprosessen av prosjektet.
• NTNU-styret ønskjer å avklare om det er politisk vilje til å realisere ei eincampusløysing. Dette alternativet må utgreiast vidare dersom det skal handsamast på politisk nivå.
• Eincampusalternativet er alt godt utgreidd i den tidlege fasen og krevjer minst tilleggsarbeid for å kvalifisere til krava for kvalitetssikringsprosessen.
– Ingen omkamp
Svein Lorentzen er ein av styrerepresentantane for dei tilsette ved NTNU. Han har kjempa mot samlokaliseringplanane sidan han vart valt inn i styret i fjor vår. Han er nøgd med 10.mai-vedtaket og meiner ikkje at rektors tilråding endrar situasjonen.
– Det ligg to klare premiss til grunn for at styret ved NTNU i det heile teke skal vurdere ei samlokalisering. Det må kome 600 millionar kroner i statsstøtte til prosjektet, og signal om dette må kome i statsbudsjettet i haust, seier han.
– Ein ny rapport viser at arealbehova på Dragvoll er veldig store. Det hastar å utvikle campusen der. Etter mi meining blir encampusalternativet meir uaktuelt for kvar dag som går.
