Vil behalde studentmakta
Nykommarane i SiT-styret ønskjer ikkje at Velferdstinget skal miste makt.
Det er Velferdstinget (VT) som vel studentrepresentantane i konsernstyret i SiT. VT kan også stille mistillit til ein av studentane i styret. Denne ordninga vert kalla tilbakekallingsretten.
Eit utval nedsett av regjeringa skal levere ei evaluering av samskipnadsordninga 24. november. Fleirtalet i dette utvalet vil truleg råde regjeringa til å fjerne tilbakekallingsretten.
Guri Melby og Maria Serafia Fjellstad er motstandarar av å fjerne tilbakekallingsretten. Dermed legg dei press på konsernstyreleiar Åge Halvorsen, som i førre utgåve av denne avisa ikkje ønskte å ta standpunkt i saka.
– VT har eit ansvar for at studentane i SiT-styret representerer studentane. For at dette ansvaret skal bli vedlikeheldt, må organet få behalde tilbakekallingsretten, seier Fjellstad.
Under Dusken har alt skrive at dei to studentane i det regjeringsoppnemnte utvalet, Norsk Studentunions Tormund Skinnarmo og Maria-Karine Aasen-Svensrud frå Studentorganisasjonen i Stavanger, vil gå mot fleirtalet i utvalet i denne saka.
