Oppvaskmøte i Studenttinget i dag

Dusken.no har fortalt om at tidlegare nestleiar følte seg pressa til å gå av frå stillinga si i Studenttinget (STi).. Han har i etterkant slutta å motta lønn fordi han har snakka med Dusken.no om dette.

Torsdag 30. oktober, klokka 17.15 er det møte i Studenttinget. Møtet blir i R10 på Gløshaugen, og klokka 21.00 vil Andreassens avgang bli diskutert på møtets siste punkt. Det er satt av 30 minutt til punktet, og møteslutt er 21.45.

Leiar Elene Slydal i Studenttinget seier at ho kjem til å gå inn for at møtet blir ope for publikum, og kritiserer dekninga til Dusken.no.

– Må vise ansvar

Studentpolitikar Eivind Rindal ved Studenttinget er mellom dei som skal på dagens møte, kvar Andreassens avgang skal diskuterast.

– Eg har mine eigne tankar om det punktet, men møtet handlar i stor grad om korleis leiinga taklar og ynskjer å vise ansvar i denne saka.

– Leiinga som er no har vore kjent for å ynskje å halde ein lav profil, til dømes når det gjeld interne spørsmål, seier Rindal.

Leder Elena Slydal for Studenttinget kjenner seg ikkje igjen i denne kritikken.

– Kritikken er for vag. Det har vore ei sak tidlegare der kommunikasjonsproblem førde til at Studenttinget ikkje vart tilstrekkeleg informert. Det har eg i ettertid beklaga, og har ikkje hatt inntrykket av at dette har vore eit problem, fortel Slydal.

Bystyrerepresentant: – Bygg opp tilliten

Jo Skårderud er vara i Trondheim studentråd og uavhengig representant i bystyret. Han er sjølv ikkje aktiv i studentpolitikken, men fortel at han har fått med seg saka likevel grunna stort medietrykk. Skårderud presiserer at han ikkje kjenner personane involverte i saka, men at han ikkje sit igjen med eit godt inntrykk.

– Det er særs «sketchy» å truge med mistillit utan å ha ein god prosess bak det. For meg på utsida framstår det som barnepolitikk.

Hans råd til Studenttinget er å prøve å byggje opp tilliten igjen.

– Dette framstår som eit studentting med mykje kameraderi. Om eg var dei, ville eg gått inn for å rydde opp.

Skårderud fortel at han ikkje veit nok om saka, men uttalar likevel:

– Eg ville ikkje gjeve min stemme til nokon av dei som har vore involverte i avsetjinga av nestleiaren.

Leiar: – Vil ha sanninga fram

STI-leiaren svarar på kritikken frå Skårderud ved å påpeike at ho meiner det har vore store faktafeil i artiklane til Dusken.no. Ho ynskjer no å rydde opp i saka, og går derfor inn for at møtet skal vera ope for alle.

– Det er viktig at sanninga kjem fram. Faktafeil på Dusken.no har ført til at reaksjonane på nett og elles i etterkant har vore på feil premiss, meiner Slydal.