Rekordhøge søkartal

Aldri før har så mange søkarar hatt NTNU som førstevalet, og aldri før har det vore så mange kvinnelege søkarar. Med årets søkartal sit NTNU igjen med heile 10 prosent av alle søkarane til høgare utdanning i Noreg.

Teknologi aukar mest

Både samfunnsfaga og lektorutdanninga har blitt meir attraktive blant søkarane, men øvst på lista står realfag og teknologi. Medan søkartalet til sivilingeniørstudiet har auka med 13 prosent, har bachelorpgrogramma i realfag fått 24 prosent fleire søkarar. I tillegg har antall kvinner som har søkt sivilingeniørstudiet auka med heile 22 prosent frå i fjor.

– Me har det sterkaste søkartalet nokosinne. At samfunnsrelevante fag som petroleumsfag og geologi trekker så mange søkarar, og at så mange av søkarane er kvinner er svært gledelig, seier Prorektor Berit Kjeldstad ved NTNU i ei pressemelding.

Læraryrket meir populært

Sidan 2008 har Kunnskapsdepartementet (KD) jobba med omfattande kampanjar for å få fleire interessert i læraryrket. I denne treårsperioda har mengda førstevalssøkarar til lærarutdanninga auka med godt over 50 prosent, noko som viser at kampanjen har vore effektiv.

– Dette er eit fantastisk resultat, og viser at læraryrket no er meir attraktivt blant ungdom enn på lenge, skriv kunnskapsminister Kristin Halvorsen i ei pressemelding frå KD.****

Nasjonal auke

Totalt har 115 764 personar søkt høgare utdanning i år, noko som tilsvarer ei auke på 6,6 prosent frå i fjor. På landsbasis er auka størst innan ingeniør- og lærarutdanningane.

– Dette er veldig kjekt, ikkje minst fordi arbeidslivet har så stort behov for teknologisk kompetanse framover. Dette er eit teikn på at regjeringas satsing på realfag og teknologi verkar, skriv statsråd Halvorsen.